'Manipulazio estrategiak' grabatzen

Pentsamendua, poesia eta doinua; hirurak batzen ditu Pettiren azken proiektuak.

 

Hain zuzen, komunikabideek gizartea manipulatzeko erabiltzen dituen estrategiak identifikatu zituen Noam Chomskyk. Gogoeta horiek alanbikatu, eta hitz eta musika bihurtu dituzte Harkaitz Canok eta Pettik.

 

Orain, estudioan dabil Petti, kantak janzten eta grabatzen, lagun musikarien konplizitateaz. 

 

Azken emaitza ezezaguna da oraindik; ez da harritzekoa sortzaileak bertigoa sentitzea, ispiluaren hondoari begiratu eta bukaera zehatza ez igartzean.

 

Bitartean, kanta horietakoren bat edo beste probatzen hasi da jendaurreko kontzertuetan. Zorroztu, beraz, belarriak eta adimena, eta, batez ere, gozatu sortu berriaren inozentziaz.  

 


Petti, konpainia noblean

Kantu eta Hitza Iruñeko kontzertu-zikloa hasteko, Pettik talde eta errepertorio bereziak bildu ditu. Tokiarekin eta giroarekin guztiz bat egiteko, abesti goxo eta sarkorrak eta puntako musikariak aukeratu ditu:

  •  Joseba Irazoki, gitarrarekin
  •  Lutxo Neira, kontrabaxuarekin
  •  Juantxo Zeberio, teklatuarekin

 

 

Kontzertua hasteko, "Erramurik gabeko gaua" eskaini zuen bakarka. Hurrengo abestian, "Ez pentsatzea", Lutxo Neiraren konpainia jaso zuen, eta jarraian gehitu ziren Joseba Irazoki eta Juantxo Zeberio. Guztien artean, blues, jazz eta rock ukituko doinuak landu zituzten, Pettiren ahots leun bezain sendoaren lagungarri.

 

Emaitza zein ikusleen harrera bikainak bultzatuta, formatu bereko kontzertu gehiago eskaintzeko asmoa dute. Adi, beraz, agendari!

 

Ikusi Iruñeko Erraldoien Txokoan eskainitako kontzertuaren lehen zatia, Xaloa telebistaren bitartez:


Bonberenean zuzenean

Kontzertuetan salgai.

Hil berria zen aitari eskainitako Awañak diskoa grabatu eta 10 urte igaro ostean, Bonberenean Zuzenean diskoa grabatu du Pettik zuzenean, Bonberenea gaztetxean emandako kontzertu batean.

 

Diskoak 14 abesti egiazko eta gordin biltzen ditu, Pettiren bilakaera musikalaren adierazgarri. Izan ere, urteen joanarekin ontzen joan dira Pettiren ahots nahasezina, gitarra jotzeko modua eta emozioak kutsatzeko ahalmena, eta gai da edozein estilo bere egiteko, maisutasunez.  

 

Grabaketa-kontzertuan, Eneko Dorronsoro trikitilaria izan zuen lagun zenbait abestitan, eta, orain, biak ari dira gau hartan sortutako magia berpizten Euskal Herriko eszenatokietan.