Sormenaren bidean aurrera

Urak bere bidea nola, bilatzen du sortzaileak berea; horretan aritu dira Harkaitz Cano eta Petti. Gauez eta azpikeriaz, Chomskyren pentsamendua alanbikatu, eta hitz eta doinu bihurtu dute.

 

Orain, argiak agintzen duen garaian, lagun musikarien konplizitateaz baliatzen ari da Petti, kantuak ontzeko eta janzteko. Laster etorriko da grabaketa-prozesua, bere katalizatzaileekin.

 

Emaitza ezezaguna da oraindik; ez da harritzekoa sortzaileak bertigoa sentitzea, ispiluaren hondoari begiratu eta bukaera zehatza ez igartzean.

 

Bitartean, kantu horietakoren bat edo beste probatzen hasi da jendaurreko kontzertuetan. Zorroztu, beraz, belarriak eta adimena, eta, batez ere, gozatu sortu berriaren inozentziaz. 

 

 


Petti, konpainia noblean

Kantu eta Hitza Iruñeko kontzertu-zikloa hasteko, Pettik talde eta errepertorio bereziak bildu ditu. Tokiarekin eta giroarekin guztiz bat egiteko, abesti goxo eta sarkorrak eta puntako musikariak aukeratu ditu:

  •  Joseba Irazoki, gitarrarekin
  •  Lutxo Neira, kontrabaxuarekin
  •  Juantxo Zeberio, teklatuarekin

 

 

Kontzertua hasteko, "Erramurik gabeko gaua" eskaini zuen bakarka. Hurrengo abestian, "Ez pentsatzea", Lutxo Neiraren konpainia jaso zuen, eta jarraian gehitu ziren Joseba Irazoki eta Juantxo Zeberio. Guztien artean, blues, jazz eta rock ukituko doinuak landu zituzten, Pettiren ahots leun bezain sendoaren lagungarri.

 

Emaitza zein ikusleen harrera bikainak bultzatuta, formatu bereko kontzertu gehiago eskaintzeko asmoa dute. Adi, beraz, agendari!

 

Ikusi Iruñeko Erraldoien Txokoan eskainitako kontzertuaren lehen zatia, Xaloa telebistaren bitartez:


Kalean da disko berria

Disko berria kontzertuetan egongo da salgai.

Hil berria zen aitari eskainitako Awañak diskoa grabatu eta 10 urte igaro ostean, Bonberenean Zuzenean diskoa grabatu du Pettik zuzenean, Bonberenea gaztetxean emandako kontzertu batean.

 

Diskoak 14 abesti egiazko eta gordin biltzen ditu, Pettiren bilakaera musikalaren adierazgarri. Izan ere, urteen joanarekin ontzen joan dira Pettiren ahots nahasezina, gitarra jotzeko modua eta emozioak kutsatzeko ahalmena, eta gai da edozein estilo bere egiteko, maisutasunez.  

 

Grabaketa-kontzertuan, Eneko Dorronsoro trikitilaria izan zuen konplize zenbait abestitan, eta, orain, biak ari dira gau hartan sortutako magia berpizten Euskal Herriko eszenatokietan. Berriro erraietatik, berriro zirraragarri. 

Abestien zerrenda:

1-PERIKA (Petti)

2-ZERU INFERNU (B. Goietxe/Petti)

3- DIRDIRA HORI   (B. Goietxe/Petti)

4-PSHIKOBURMUIN (Petti)

5-OASIA (Petti)

6- XORIERI MINTZO ZEN (Mixel Labegerie/Petti)

7-ERRAMURIK GABEKO GAUAK (H. Cano/Petti)

8-EZ BARKATZEN (B. Goietxe/Petti)

9-AZKEN AETZAREN BALADA (E.Barberena/Petti)

10-NI NAIZ (E.Barberena/Petti)

11-LAGUN MINAREN BLUESA (Petti)

12-GAIZKIEGINAK (Petti)

13-SOLASALDIA   (Petti)

14-RANROBERRAN   (Manolo Urbieta)

Perika




Arriskuak, babeslekuak eta akuiluak

Arg: David Herranz/Loraldia
Arg: David Herranz/Loraldia

Tabernak leku arriskutsuak dira sortzaileentzat; batez ere, beste sortzaile batzuekin topo egiten badute. Gerta liteke sortzaile bat (demagun Petti izena duela) taberna batera sartzea inolako asmo berezirik gabe, eta han beste bat topatzea, hura ere asmo jakinik gabe (demagun Harkaitz Cano duela deitura).

 

Litekeena da orduan gizartearen ajeez filosofatzen hastea, eta hitzak eta doinuak nahastea. Eta batere asmorik ez bazuten ere, proiektu bat abiatzea elkarrekin. Hori dena gerta liteke, eta baliteke, beraz, orain horretan aritzea, buru-belarri.

Bitartean, babeslekuak bilatuko ditu sortzaileak (Pettik, adibidez), eta, lagunen arrimuan, lan ederretan parte hartuko du. Esaterako, Imanolen omenezko kontzertuan, Karlos Jimenez, Iñaki Salvador eta Ainara Ortegarekin batera.

 

Eneko Dorronsoro trikitilariarekin, berriz, jolas berriak asmatuko ditu, zaleen harridura eta gozamenerako.

 

Hori bai, arriskuak eragindako zorabioa ahaztu gabe. hura baitu sormenerako akuilu.